Mis Dihei

Hallo mini Liebe

Wie gahts eu allne?

Mir gahts super… Han ganz e lässigs dihei und e super Familie!

S Wetter isch au traumhaft… Immer Sunne und schön warm! Momentan aber z heiss! Mir händ hüt 41° und das au di nächste Täg… Am Dunnstig sogar 43°… Das kennt min Körper natürli nöd eso! :)

Aber bin da nöd di einzig, sogar dä Familie isches etz z heiss! Chan bi däne Temperature gar nüt rechts mache, Huus verschlüsse und warte bises chli chüeler wird am Abig! Immerhin e Abchüehlig uf 25-29°…:)

Bin hüt Mittag däzue cho Föteli vo mim neue Dihei z mache… Wird’s grad uf Picasa tue, das ihr alli chönt teilha! Hoffe chan jewiils en Kommentar mache, das ihr wüssed, was was isch! :)

Han au no äs paar Föteli vo dä Gegend…Im Barossa Valley isches mega grüen wäg dä villne Rebe rund ume aber usserhalb ganz dürr und trocke.

Aber d Gegend isch wunderschön! Und dä Wy isch au super! Han scho eimal chöne Wy probiere… Bin i das alles ihgfüehrt worde. :)

Wünsche eu allne ganz e schöni Wuche, schicke eu ganz warmi liebi Grüess i di chalt Schwiiz…

Bis bald!

Miriam

Grüess us Adelaide

Au ich melde mich mal wieder. Vorerst danke vill mal für alli Mails. Freue mich immer über Nachrichte und News vo eu.

Ich bin wiit umecho i dä letschte Ziit. Ein Tag nach dä Pinnacles-Tour bin ich Richtig Süde greist miteme Car. Det ahcho bin ich vomene Schwiizer-Päärli in Empfang gnoh worde. Sie beide han ich in Perth dur äs anders Kollege-Päärli kenneglernt… Komplexi Sach. :-)

Sie händ mir d Kultur und d Gegend zeiget. Isch sehr spannend und wunderschön gsi. Am Sunntig-Morge han ich denn e Halbtages-Tour buechet… Kanu fahre, Caves ahluege und australisch esse isch ufem Programm gstande… Sogar so en komische australische Wurm, Witchetty Grub, han ich probiert. Hät mi sehr vill Überwindig kostet… Aber nöd mal schlecht ischer gsi. :-)

Äs wiiters Erlebenis uf dere Tour isch s Chrüüche dure Höhli gsi. Am engste Punkt hät mer ufem Buuch müesse dureroppe. Chönd eu ja vorstelle, wie dreckig ich usecho bin. :-)

Susch han ich det vill vo dä Gegend, dä Stränd und em Tierriich gseh… Wildi Kangaroos händ mer Ihdruck gmacht und d Kookaburras, wo s Gfühl häsch sie lached dich us wänn mitenand gsprächled. Sogar Schlange han ich det gseh. Tod isch sie zum Glück gsi… Brown Snake, di dritt-giftigst Schlange in Australie.

Diä 5 Täg Margaret River und Cowaramup sind super schnell umegange. Scho bald häts gheisse abschied näh und wieder 6h mitem Car uf Perth fahre. Am Dunnstig, 15.1.09, han ich denn dä Wiiterflug uf Adelaide gah.

Am Flughafe an Adelaide bin ich herzlich vo dä Au-Pair-Familie abgholt worde und mir sind i mis neue Dihei für die nächste zwei Mönet gfahre…

Han e super netti Familie… Sehr zuvorkommend, eifach und lieb… Muen chli helfe Choche, chind luege, chli abwäsche und that’s it. Han momentan äs lockers Läbe da in Süd-Australie… :-) Han sogar mis eigne „Chliine Hüüsli“… E Art umbauti Garage! Aber praktisch ihgrichtet und det han ich mis eigne Riich und chan mich zruggzieh, wänns mer mal z vill wird! :-) Wirde bald Bilder mache und diä ufs Album tue.

Immer eifach mit dä Chind isches nöd! Hüt han ichs s erste Mal allei ghüetet… So ganz folge düents mer also noni… :-) Aber au das wird immer besser werde, wie mis Englisch.

Hoffe chan mich bald wieder bi eu melde! Meh Föteli sötted au bald cho!

Macheds guet, hebed sorg und bis bald! Xx



Miriam

G'day!

Ich hoffe äs gaht eu allne guet!
Ich bin etz scho bald ei Wuche da in Perth! D Stadt gfallt mer super... Nur hani sie etz langsam gseh! Darum gahni etz uf Entdeckigstour... :-D
Am Mittwuch, 7.1.09 bini uf Rottnest Island gange! Das isch e chlini Insle, wo mer entweder z Fuess oder mitem Bike underwägs isch! Ich han s Zweite gwählt, das ich chli wiiter chume und chli Fahrtwind han i dere Hitz... Hät super schöni Stränd und isch super schön zum Schnorchle! Zuen äs paar Föteli druf, seit meh als mini Wort! Isch eifach traumhaft gsi!
Heisse tuet die Insle, will det lustigi Tier wohned! Früehner, womer diä entdeckt hät, händ d Lüüt gmeint das seged grosse Ratte... Daher händs diä Insle "Rats nest" tauft... Sind aber i Würklichkeit chlini Büüteltier! Han lustigi Erfahrige gmacht mit dene! Hanis guet gmeint und vo minere Banane abgeh, denn isch mer di eint grad nachgsecklet! ich natürlich dävo, will ich det noni gwüsst han, dass eigentlich gar nüt mached! :-D
Hüt, 8.1.09 hani e wiiteri Tour id Pinnacles gmacht... Das isch e Wüesti mit luuter Steihüüfe, Kalk-Ablagerige vo früehner... Isch wunderschön gsi! Wiiter händ mer uf däre Tour chöne Kangaroos füettere und Koalas streichle! Ganz e speziell neui Erfahrig gsi! Und natürlich Sandboard-Fahre! :-) Motte: Muul zue und abe... :-D

Ja und morn Morge heissts Abschied neh vo Perth.. Reise mitem Zug richtig Süde und denn i 6 Täg langsam wieder uf Perth, will ich am 15. Jan. nach Adelaide zu minere Familie flüüge!

Wünsche allne e gueti Ziit und bis bald!
xx

Ahkunft in Perth

Hallo zäme...

Ich bin nach öppe 28h Reis in Perth ahcho! Isch ewigs gange... Daher bin ich recht gschafft, freu mi ufs Bett, mal wieder waagrecht chöne z schlafe! Momentan isches no 27°C, obwohls scho 2 am Morge isch...
Momentan han ich 8h Ziitunderschiid zu dä Schwiiz! Sött also scho mal is Bett, nur seit mini inneri Uhr immerno, dases ersch 6i isch am Abig... :-)

Melde mich denn wieder, wänni chli meh z verzelle han! Hebeds guet!

Eui Miriam