lang lang isches her...

Lang lang ische min letschte Blogihtrag her! I dere Zwüscheziit han ich extrem vill erlebt! Leider chan mer diä ville Ihdrück, Erlebniss, Taucherfahrige und und und nöd alles niederschriibe! Denke isch so oder so besser das denn persönlich z verzelle, chume bald wieder hei! I 2 Wuche isch mini Reis am Endi und äs heisst wieder in Alltag hei z cho! Doch freu mi etz langsam au dadruf! Mer fühlt sich mit dä Ziit überall wohl, aber natürlich niä so fest wie dihei!

Diä 8 Wuche, woni in Fiji ufere Insle, ab vo allem, verbracht han, sind super erlebnisriich, spannend, lernriich und ihdrücklich gsi! Uf dä einte Siite s Tauche, wo mir extrem Freud gmacht hät und au super schön gsi isch; denn dä nächi Kontakt, wo mir mit Ihheimische gha händ und nöd z vernachlässige das eifach organisierte Camp-Läbe!

Zersch chli öpis chlises zum Campläbe:
40 Lüüt, 33 Volunteer und 7 Staff händ uf relativ chlinem Ruum zämegläbt. Ich bin ime Hüüsli mit 7 anderne gsi, nebscht allne Ratte, wo au no mit eus ghuuset händ! Ab und zue au im gliche Bett, was aber denn Geschrei und schlaflosi Nacht bedüütet hät. Kei Badzimmer, kei Spiegel, Plumps-Klo, kei flüssend Wasser, überall Sand, kei Privatsphäre, kei warm Wasser, alles im Meer wäsche, niä würklich frischi Kleider usw. Duschi händ mer i dä erste Wuche baue, das wenigstens mal häsch chöne dusche ohni gseh z werde! Aber das natürlich miteme Kübel bruunem Regewasser und eme Configlas, wo als "Wasser-Schöpfgfäss" dient hät. Idee hät mer bruucht, susch isch mer denn schnell ufgschmisse gsi!
Jede Tag hät mer äs Ämtli gha... Obs Koche, putze oder susch Sache uf vordermaa bringe gsi isch, beschäftiget isch mer immer gsi!
S Ässe isch sehr eifach und au eisiitig gsi! Da mir immer nur 3h am Tag Strom miteme Generator gha händ, isch natürlich au kein Chuüehlschrank vorhande gsi... Büchseässe isch daher d Konsequenz gsi... Ja und dä Porridge jede Morge bruucht au sini Ahgwöhnigsziit...
Chönt no vill vill meh verzelle... Git keis Endi...

Zum Tauche:
Das isch super schön in Fiji, hani am meiste gnosse! So vill Fisch, Koralle, Schildkröt, Haie usw. Uf jedem Tauchgang häts neui Pünkt zum entdecke gäh!
Han gsammthaft 46 Tauchgäng gmacht in Fiji, dävo Strömigstauchgäng, Nachttauchgäng, Tüüftauchgäng und natürlich d Surveys, womer denn gschafft händ und verschiedeni Sache zählt händ! Dadävo han ich unzähligi Schildkröte und Haie gseh! Immerwieder äs Erlebnis gsi!
I däne 8 Wuche han ich au dä Advanced-Taucher und dä Rettigstaucher gmacht! Isch alles sehr hilfriich und au lustig gsi, v.a. dä Rettigstaucher!

Und z letscht no öpis zum Dorfläbe:
Jede Sunntig händ mir im 30min entfernte Dorf verbracht. Jede Volunteer hät e Gastfamilie becho. Mit ihne händ mir gässe und dä ganz Tag verbracht.
Am Morge isch Chille ahgseit gsi, öpe 1,5-2h! Dadäzue händ mir äs speziells Chleid brucht, s Bula-dress! :)
Denn häts immer ganz feins Zässe gäh und am Namittag isch Mittagsschlaf und Nütmache ahgseit gsi!
Diä Ziit han ich extrem gnosse, da mer normalerwiis bim reise niä so näch ine Kultur ine gseht, wie mir händ därfe! I dere Region sind mir au wiit und breit di einzige Touriste gsi, daher gar nöd veränderet oder uf dä Weste usgleit!

Das isch mal chli öpis gsi vo Fiji!

Etz bin ich sitem 19. Juni mitem Felix underwägs und gnüsse diä Ziit extrem, nüme allei underwägs z sii und wieder öper sehr vertrauts a minere Siite z ha!
Mir händ im Norde vo Vietnam gstartet, in Hoian! Händ diä Stadt besichtiget, denn en Tagesusflug gmacht. Sind denn no wiiter in Norde, fasch a di chinesisch Grenze, nach Sapa greist mitem Nachtzug! Das isch rel. höch gläge und bekannt für Riisahbau. Terrasse sowiit s Aug reicht. Händ det verschiedeni Dörfer bsuecht, Black- wie au Red H'mon People. Z erchenne a dä verschiedene farbige Hüet und Kleider!
Nach dene paar Täg denn zrugg nach Hanoi und direkt ad Halong Bay! Au sehr ihdrücklich gsi! Händ e lässigi Gruppe und ganz äs schöns Boot gah, wo mir ei Nacht au druf pfuset händ!
Dänn isches miteme Nachtbus nach Hué gange, 15h...! Überhaupt nöd ahgnehm gsi, wird eusi letschte Nachtbus-Erfahrig gsi si... S Bett z chli, z holperig, gar nöd euses Ding!
Momentan sind mir in Hoi An. Das isch s Paradis zum sich massgschneidereti Sache mache z lah, inklusive Schueh! Schniiderläde und Schuehläde isch das wo dominiert, nebst dä wenige Restaurants! :)
Händ scho chli öpis wenigs i Uftrag gäh! :)

So etz isch langsam Ziit für is Bett! Hoffe han eu chli öpis chöne überebringe! :) Und susch bin ich bald wieder dihei, woner mich denn chönd löchere mit Frage! :)

Wünsch allne ganz en schöne Summer, gnüsseden! Bi eus isches super schön, nur vill z heiss...

Di beste Grüess us Vietnam vo mir und em Felix

letschte Biitrag fuer di naechste 8 Wuche!

Melde mich nomal ganz churz! Han mich nacheme Kulturschock sehr guet in Fiji ihglaebt und alli andere 39 kenneglernt! Schient mir ganz e sympatischi und lustigi Truppe z sii! Isch scho ganz e anderi Welt da und das nur 3,5 Flugstunde vo Australie entfernt. Aber waenn mer sich mal ihglaebt haet, isches s Paradies... Gester sind mer bin Schniider gsi zum aes Fiji-Dress schniidere lah, bruched das immer am Sunntig fuer id Chille! Det wo mir hii goend sinds sehr traditionell, daher isch das aes MUSS! Bin scho mega gspannt uf morn, waenn mer das bechoemed... :) Chum zum glaube, s Herstelle mit Stoff chost mich 10 Franke...
Huet sind mer gross uf Shoppingtour gange zum alles ihchaufe, was mir fuer di naechste 8 Wuche bruuched... Jaaa nuet vergaesse, denn det gits KEI Moeglichkeit das z besorge, sind ab vo dae Welt! Daezue ghoert noed s Aesse, das bechoemed mir aber alles drum und drah. Bspw. wie mer dae morgendlich Porridge chan gnuessbar mache (Zimet, Sultanas, Troechneti Fruecht, Confi, Marple Sirup...), ganz vill Sunnecreme, Mosquitospray, Creme gege Mosquitostich, uns und und... Mini Postiliste isch sehr lang gsi! :) Noed eifach das alles z plane... Aber bin zueversichtlich, dasi alles han! :)
Morn Mittag gahts denn los Richtig Faehre und denn 12h Ueberfahrt nach Savusavu. Det werded mir am 6i am Morge ahcho, no di letschte Sache organisiere und denn per Holpperstrass richtig eusere Insle fahre. Wird en lange Tag morn aber freue mich riesig, endlich uf dae Insle z sii, s Laebe gnuesse und ganz vill neui Ihdrueck choene mit z neh. S Highlight werded diae wuechentliche Bsuech im Dorf sii und natuerlich d Tauche! :D
Ich bin immer uf mim Schwiizernatel erreichbar, fuer all wo sich so waend melde! :) Wuerd mich uf s einte oder andere SMS sicher sehr freue... :)
Jetzt wuensch ich eu allne ganz e gueti Ziit und ihr werded i 9 Wuche wieder vo mir ghoere! :)
Miriam

In Fiji

Ich bin guet, mit chli Turbulenze in Nadi, Fiji ahcho! Han dae Tag huet chli verbracht mit am Pool umeliege und uf Nadi gah aes paar Sache go poste, v.a. guenstigs Wasser! Han kei Lust im Hotel 4.- fuer 1,5 Liter z zahle!
Ja und Sydney han ich extrem gnosse! Diae Stadt haet mir nachem erste Morge scho sehr gfalle! Foeteli vo det wird ich morn ufelade! :)
Leider muen ich eu saege, das sich mini Befuerchtige bestaetiget haend und ich da nur sehr schlecht und tuers Internet han! Waenn ich denn mitem Projekt ahgfange, naechst Mittwuch, wird ich fuer die naechste 8 Wuche kei Internet, Telefon und wenig Natelempfang ha! Haend also kei Angst, waenn ihr vo mir nuet meh ghoered!
Hoffe chan denn alli Mails in Vietnam beantworte! :) Wirde mir sehr Mueh gaeh!
Die naechst Wuche wird ich uf e anderi chlini Insle gah und 3 Taeg fuul am Strand umeliege, go schnorchle gah, Fiji und diae Straend gnuesse und lese! :) Hoffe chan denn naechst Wuche diae letschte Foeteli vo daem Trip no ufelade, bevor ihr fuer as Wiili denn nuet meh vo mir ghoered!
So fuer mich isch etz denn Betttime! Wuensche eu ganz e gueti, restlichi Wuche und bis gli! Hebed Sorg!
Miriam usem traumhafte (traeumerische) Fiji

Diä letschte Täg in Australie am gnüsse!

Wie ihr viellicht scho gseh händ, han ich gester neui Föteli ufeglade. Leider hani i dä letschte 1,5 Wuche nöd all zu vill gmacht, da s'Wetter nöd so guet gsi isch und sehr oft gregnet hät... (Gseht mer uf paarne Föteli au) Hani mini Kamera nöd immer wele uspacke! :)
Ich bin guet nach Sydney cho mit "mim" Auto. Bin in Brisbane gstartet, denn hani en Halt in Surfers Paradise, Byron Bay, Coffs Harbour, Port Macquarie, Newcastle und i dä Blue Mountains gmacht... Das isch min Trip gsi, für alli, wo diä Region chli kenned. :)
Han äs grosses Erlebnis miteme Füüralarm gha! Bin ime Dörfli ime Backpacker gsi und han nach langem wiedermal mis eigete Zimmer gha... Isch überhaupt nöd usbuechet gsi, han also 7 leeri Bett im Zimmer gha! Und denn plötzlich isch am morge am 6.20 dä Füüralarm i mim Zimmer los. Ich natürlich gstande im Bett und zersch kei Ahnig gha was los isch! Han denn mis Buuchtäschli packt und bin mit Pyjama abe zu dä Rezeption. Det niemert ume... Isch mer nüt anders übrig bliibe als verusse z warte, bis öper chunnt! Isch mer det denn nüme so ghür gsi und super gange... Hasse das, wänni hilflos bin! Han denn diä Ziit gnutzt und mitem Felix telefoniert! Bi mer scho chli komisch vorcho mitem Pyjama uf dä Strass z stah am telefoniere! :)
Und etz gnüssi das schöne Sydney! Bin gester im Zoo gsi! Dä isch ganz schön gläge, gsehsch über di ganz Stadt, nebst natürlich dä Tier wo's au no zum bestune git! :)
Und hüt bini i dä Stadt umegloffe, a zweine Märt gsi und hans eifach gnosse da. Han mich denn no mitere Amerikanerin troffe, woni bim reise kenneglernt han und sie isch etz zuefelligerwiis au grad in Sydney miteme Kolleg. Bin allei aber doch nöd allei! Sie beide sind nöd di einzige woni kenne da. Ä Schwiizerin, woni au bim reise kenneglernt han, triffi no und eini vo in Sydney wohnt, möchti au no go bsueche! Mal luege ob mer d Ziit für alles langet...:)
Hoffe sehr, das ich eu uf dä Fiji chan ufem Laufende halte! Han sicher durd Wuche kei Internet aber hoffentlich denn jedes Weekend, wänn mer zrugg is Dorf gönd... Und wänn ihr niä öpis vo mir ghöred, chönder dävo usgah, dasi würklich kei Internet han! :) Was sehr schad wär, aber uf dä andere Siite au äs Erlebnis! Trotz allem hoffi natürlich scho, dasi han! ;)
Wirde am Ziistig no äs paar Föetli vo Sydney ufelade, das ihr das au no gsehnd. :) Wirde nöd däzue cho, diä letschte Erlebnis mitzteile... Nur visuell!
Wünsche eu ganz en schöne Früehligsahfang, gnüssed s sunnige Wetter!
Ganz liebi Grüess us Sydney!
Miriam

Äs Lebenszeiche!

Ich melde mich au wieder emal! Bin i letschter Ziit nöd däzue cho und han mich i Gegende ohni Internet und Natelempfang umetriebe! :)
Bin nach dä Great Ocean Road und 4 Täg Melbourne nach Alice Springs gfloge, woni e 4-tägigi Tour gha han! Sind dä Ayers Rock bi Sunneufgang und -undergang go ahluege, händ d'Olgas besichtiges, sind dur dä Kings Canyon gloffe und händ susch no ganz vill interessanti und schöni Sache gseh! Nebst all dem händ mir e bunt gmischti Gruppe gha! Immer en Witz parat, händ glachet, gueti Gspräch gha und eifach diä Ziit zäme gnosse!
Nachher bini uf Brisbane gfloge, ha en Tag ziit gha zum nach Hervey Bay z cho. Vo det us han ich denn e 2-tägigi Tour uf Fraser Island gha! Das isch di weltgrössti Sandinsle! Sand, Sand und nomal Sand. Pflanze und Tier händ di Insle chöne besidle, aber zum Glück isch sehr vieles no Natur. Kei pflasterti Strasse (Highway isch am Strand, mer fahrt eifach und haltet dä Linksverkehr ih, wohlverstande mit max. 80 km/h...), nur chlini Dörfli und kei Shops usw.
Das hät mich sehr erstuunt, i dä hütige Ziit, wo dä Mensch i alles ihdringt...
Sind d Insle go erkunde, go bade i Süesswassersee und händ zueglueget, wies bime grosse Bus (eusem Bus) än Radwechsel mached! Wohlverstande mir händ em Platte gha; plötzlich äs komisches Gfühl underem Füddli und scho händ mer ghalte! :)
Denn bini wieder miteme Bus zurgg nach Brisbane und han det äs Auto in Empfang gnoh, woni 9 Täg ziit han zum nach Sydney fahre!
Leider spielt s Wetter momentan nöd grad so mit! Gester häts nur 1x gregnet... Isch no schwierig denn öpis z mache, da s meiste verusse isch! Ich han mich denn entschiede go shoppe z gah und Souvenirs für mini Liebste dihei ihzchaufe. Han im Grosse und Ganze s meiste gfunde! :) Hoffe eifach uf chli besserig i dä Wettervorhersag!
I dä nächste und letschte 2 Wuche in Australie han ich no eniges vor mit Tauchsache für d Fiji z chaufe und diä Ziit dete vorzbereite... Wird mir also sicher nöd langwillig werde! :)
Hoffe chan mich nomal melde bevors nächste Abentüür losgaht!
Gnüssed d Föteli und bis bald, hebed eu Sorg!
Eusi Miriam us dä Gold Coast!

S'Reise hät ahgfange!

Am Samstig hät mich d Familie nach Adelaide bracht, wo ich am Namittag s Auto bin go abhole. Isch mer also scho chli schwer gfalle, mich vo ihne z verabschiede... Han doch zwei Mönet det gläbt und e super Ziit gha. Aber sie sind ja nöd us dä Welt... Schriebed immer öpe SMS und im Herbst chömed sie sehrwahrschindli wieder uf Düütschland, wo ich sie denn sicher wird go bsueche.
Han d'Nacht no in Adelaide verbracht bi dä Darianna. Sind fein go z'Nacht esse und händ dä wunderschön, für mich letschte Abig in Adelaide gnosse unds ganz lustig gha.
Am Sunntig bin ich denn ufbroche. Leider hät sie nöd chöne mitcho, doch sie flüügt am Dunnstig nach Melbourne und denn chönd mir diä viert Täg det zäme verbinge! Findi ganz lässig...
Jetzt reisi langsam mitem Auto nach Melbourne. Halte immer chli i Dörfli, luege ume, gah go Sehenswürdigkeite ahluege usw. Diä Täg gönd immer so schnell verbii!
Gester bini in Mt. Gambier gsi. Det häts zwei Kratersee, dä einti isch ganz blau und riesig, isch mega schön gsi zum luege! Rund um diä chli Stadt, chan mer vill Sehenswürdigkeite go ahluege, wo dur vulkanischi Aktivitäte entstande sind.
Am Tag vorher bini dä ganz Morge go Höhle besichtige! I dä einte händs ganz vill Knöche vo Tier gfunde, wo früehner det gläbt händ. Isch vo dä biologische Siite sehr interessant gsi für mich! :)
Ja und uf morn freu ich mich ganz bsunders... D Great Ocean Road staht vor dä Türe... Chans chum erwarte diä Road z fahre und eifach nur z gnüsse! Wirde denn sicher ganz vill Föteli chöne liefere... :)
S Wetter isch nüme ganz so guet, sit ich Adelaide verlah han. Immer bedeckt! Vorgester häts all 5min gregnet und zwüschet hät sich d'Sunne blicke lah, ganz speziell gsi! Hoffe s'Wetter wird morn chli besser... Aber d'Nachrichte säged guets vorrus! :)
Melde mich bald wieder. Hebeds guet!
Liebs Grüessli jetzt us Victoria! :)

Update!

Han gester währendem Jogge no Föteli gmacht vo dere Rundi, woni 3x pro Wuche bin go renne! Isch grad no en wunderschöne Sunneundergang gsi! :-D Han denkt muen diä au no Ufelade!
Wie ihr gsehnd, au s'Jogge isch wunderschön da! :-) Macht einiges meh Spass i dä Wärmi und sonere Gägend...