lang lang isches her...

Lang lang ische min letschte Blogihtrag her! I dere Zwüscheziit han ich extrem vill erlebt! Leider chan mer diä ville Ihdrück, Erlebniss, Taucherfahrige und und und nöd alles niederschriibe! Denke isch so oder so besser das denn persönlich z verzelle, chume bald wieder hei! I 2 Wuche isch mini Reis am Endi und äs heisst wieder in Alltag hei z cho! Doch freu mi etz langsam au dadruf! Mer fühlt sich mit dä Ziit überall wohl, aber natürlich niä so fest wie dihei!

Diä 8 Wuche, woni in Fiji ufere Insle, ab vo allem, verbracht han, sind super erlebnisriich, spannend, lernriich und ihdrücklich gsi! Uf dä einte Siite s Tauche, wo mir extrem Freud gmacht hät und au super schön gsi isch; denn dä nächi Kontakt, wo mir mit Ihheimische gha händ und nöd z vernachlässige das eifach organisierte Camp-Läbe!

Zersch chli öpis chlises zum Campläbe:
40 Lüüt, 33 Volunteer und 7 Staff händ uf relativ chlinem Ruum zämegläbt. Ich bin ime Hüüsli mit 7 anderne gsi, nebscht allne Ratte, wo au no mit eus ghuuset händ! Ab und zue au im gliche Bett, was aber denn Geschrei und schlaflosi Nacht bedüütet hät. Kei Badzimmer, kei Spiegel, Plumps-Klo, kei flüssend Wasser, überall Sand, kei Privatsphäre, kei warm Wasser, alles im Meer wäsche, niä würklich frischi Kleider usw. Duschi händ mer i dä erste Wuche baue, das wenigstens mal häsch chöne dusche ohni gseh z werde! Aber das natürlich miteme Kübel bruunem Regewasser und eme Configlas, wo als "Wasser-Schöpfgfäss" dient hät. Idee hät mer bruucht, susch isch mer denn schnell ufgschmisse gsi!
Jede Tag hät mer äs Ämtli gha... Obs Koche, putze oder susch Sache uf vordermaa bringe gsi isch, beschäftiget isch mer immer gsi!
S Ässe isch sehr eifach und au eisiitig gsi! Da mir immer nur 3h am Tag Strom miteme Generator gha händ, isch natürlich au kein Chuüehlschrank vorhande gsi... Büchseässe isch daher d Konsequenz gsi... Ja und dä Porridge jede Morge bruucht au sini Ahgwöhnigsziit...
Chönt no vill vill meh verzelle... Git keis Endi...

Zum Tauche:
Das isch super schön in Fiji, hani am meiste gnosse! So vill Fisch, Koralle, Schildkröt, Haie usw. Uf jedem Tauchgang häts neui Pünkt zum entdecke gäh!
Han gsammthaft 46 Tauchgäng gmacht in Fiji, dävo Strömigstauchgäng, Nachttauchgäng, Tüüftauchgäng und natürlich d Surveys, womer denn gschafft händ und verschiedeni Sache zählt händ! Dadävo han ich unzähligi Schildkröte und Haie gseh! Immerwieder äs Erlebnis gsi!
I däne 8 Wuche han ich au dä Advanced-Taucher und dä Rettigstaucher gmacht! Isch alles sehr hilfriich und au lustig gsi, v.a. dä Rettigstaucher!

Und z letscht no öpis zum Dorfläbe:
Jede Sunntig händ mir im 30min entfernte Dorf verbracht. Jede Volunteer hät e Gastfamilie becho. Mit ihne händ mir gässe und dä ganz Tag verbracht.
Am Morge isch Chille ahgseit gsi, öpe 1,5-2h! Dadäzue händ mir äs speziells Chleid brucht, s Bula-dress! :)
Denn häts immer ganz feins Zässe gäh und am Namittag isch Mittagsschlaf und Nütmache ahgseit gsi!
Diä Ziit han ich extrem gnosse, da mer normalerwiis bim reise niä so näch ine Kultur ine gseht, wie mir händ därfe! I dere Region sind mir au wiit und breit di einzige Touriste gsi, daher gar nöd veränderet oder uf dä Weste usgleit!

Das isch mal chli öpis gsi vo Fiji!

Etz bin ich sitem 19. Juni mitem Felix underwägs und gnüsse diä Ziit extrem, nüme allei underwägs z sii und wieder öper sehr vertrauts a minere Siite z ha!
Mir händ im Norde vo Vietnam gstartet, in Hoian! Händ diä Stadt besichtiget, denn en Tagesusflug gmacht. Sind denn no wiiter in Norde, fasch a di chinesisch Grenze, nach Sapa greist mitem Nachtzug! Das isch rel. höch gläge und bekannt für Riisahbau. Terrasse sowiit s Aug reicht. Händ det verschiedeni Dörfer bsuecht, Black- wie au Red H'mon People. Z erchenne a dä verschiedene farbige Hüet und Kleider!
Nach dene paar Täg denn zrugg nach Hanoi und direkt ad Halong Bay! Au sehr ihdrücklich gsi! Händ e lässigi Gruppe und ganz äs schöns Boot gah, wo mir ei Nacht au druf pfuset händ!
Dänn isches miteme Nachtbus nach Hué gange, 15h...! Überhaupt nöd ahgnehm gsi, wird eusi letschte Nachtbus-Erfahrig gsi si... S Bett z chli, z holperig, gar nöd euses Ding!
Momentan sind mir in Hoi An. Das isch s Paradis zum sich massgschneidereti Sache mache z lah, inklusive Schueh! Schniiderläde und Schuehläde isch das wo dominiert, nebst dä wenige Restaurants! :)
Händ scho chli öpis wenigs i Uftrag gäh! :)

So etz isch langsam Ziit für is Bett! Hoffe han eu chli öpis chöne überebringe! :) Und susch bin ich bald wieder dihei, woner mich denn chönd löchere mit Frage! :)

Wünsch allne ganz en schöne Summer, gnüsseden! Bi eus isches super schön, nur vill z heiss...

Di beste Grüess us Vietnam vo mir und em Felix