Hello

Das Weekend sind mer zu dä Eltere vo dä Deb än Bsuech go abstatte! Sie wohned zwei Autofahrstunde vo eus entfernt am Meer in Victor Harbor. S Huus isch wunderschön! Äs isch direkt ame 2,5km lange künstliche See, mit chliinem Schiffssteg und Kanu.
Dä Platz isch wunderbar gsi zum äs Wucheend usruebe und nüt mache! :)

Am Samstig isch traumhafts Wetter gsi; sunnig und emal nöd z heiss…
Mir sind chli go bade, Kanu fahre, plantsche usw.
Am Sunntig isch denn leider bewölkt gsi und nur no 20 Grad… Bin ich mir scho nüme gwöhnt gsi, han also äs Jäggli brucht! :)
Desto trotz bin ich im Meer go schnorchle! Han mer das vorgnoh und denn au durezoge! Nur leider leider han ich nüt meh gseh als Seegras! Seegras da, Seegras det! Und än chline Fischschwarm mit chline, nöd farbige Fisch!
Im Nachhinein han ich mir müesse ihgestah, das sich s früüre nöd glohnt hät.
Ein Vorteil häts gha… Han mini wasserdicht Box fürd Kamera chöne usprobiere!

Aber mir gahts guet! Zum Glück sind mer nöd i dere Region mitem Firestorm. Dä wüetet im Nachbarstaat! Isch krass, wievill Lüüt händ müesse s Läbe lah! D Hitz zäme mit dä Dürri und em Wind isch verantwortlich für das Usmaas. Momentan sinds 108 bestätigti Toti… Normalerwiis sterbed ime Firestorm nöd meh als 10 Lüüt. Leider wird dä id Gschicht ihgah… Gar nüt schöns…

Gester han ich äs anders Au-Pair vo Finnland kenneglernt. Sie isch am Friitig ahcho und wohnt nur grad 5min entfernt vo mir mitem Auto! Wirde i Zuekunft sicher vill Sache chöne mit ihre underneh, was mega lässig isch!

Momentan bin ich chli am mini Weekends plane! Han no sooo vill vor und nur no 4 Wucheends übrig! Denke wird a dene immer öpis underneh und Sache i dä Umgebig go ahluege! Freue mich sehr uf das!

Han wieder äs paar Föteli ufeglade vom Wucheend in Victor Harbor. Gnüsseds und ihr ghöred bald wieder vo mir!

Sunnigi Grüess us Light Pass