Kangaroo Island-eifach traumhaft!

Äs herzlichs G'day id Schwiiz!

Ich han mit dä Minna und dä Darianna äs super Weekend verbracht uf Kangaroo Island. Das isch e Insle 1,5h Fahrt mitem Auto vo Adelaide und denn no 45min Überfahrt mit dä Fähre! Mir händ eus alli scho am Friitig-Abig in Adelaide troffe und händ d'Nacht det ime Backpacker verbracht, da mir am Samstig-Morge bereits am 6.15 Uhr abgholt worde sind.

Am Samstig isch leider nöd so guets Wetter gsi! Bedeckt und für Australie relativ chüehl; händ dä ganz Tag en Pulli brucht! Isch trotzdem super schön gsi! Mir händ zersch en Abstecker zu dä Remarkable Rocks gmacht. Das sind Steiformatione, wo mit dä Jahre dur dä Wind gformt worde sind, direkt am Meer. Isch sehr ihdrücklich gsi diä riese Felse z gseh, z bestiige und natürlich äs paar Föteli z mache! :)

Ahschlüssend sind mer dur dä Flinders Chase Nationalpark gfahre. Leider sind nur no abbrennti Bäum sichtbar, da voreme Jahr en Waldbrand gwüetet hät! Doch da d'Wurzle dä Brand überlebt händ, spriessed etz chline, neui, grüeni Zwiig zum Bode us.
Nachher händ mer no e Bird-Show chöne gseh, s erste mal Kukkaburras i dä Nächi gseh!
Vorem z'Nacht sind mer denn no zu Admirals Arch gfahre. Das isch e riesigi Steibrugg und det chan mer zuesätzlich au grad wildlebendi neuseeländischi Seehünd beobachte! Nur leider stinkts det chli z fest, wäg dene Tier...:)

Nachem Nachtesse sind mer ufe Nachtwanderig gange go chlini Pinguine sueche, wo 1h nachem Sunneundergang as Land chömed! Über Stock und Stei isches gange; aber glohnt hät sichs alleweil! Händ 10 Pinguine gfunde. :D
Isch schwierig diä z finde, wills nur öpe 30cm gross sind! Zuesätzlich händ mer no zwei Wallabies und zwei Oppossums gseh.

Am nächste Morge sind mer vome Didgeridoo gweckt worde. Zum z'Morge häts typisch australischi Pancakes gäh! Fein aber nöd figurbewusst... :)
Als ersti Attraktion isch d'Seal Bay ufem Programm gstande. Det chan mer us nächster Nächi Seehünd beobachte, wiäs mitenand spieled und dä Tag gnüssed! Isch so ihdrücklich: a däm Strand z'höckle, z'gnüsse und z'beobachte!

Fun bim Sandboarde! Düne erklimme und denn dä Hang hurab. :D Würklich lustig! Mir händ denn no zum Hardcore-Grüppli ghört, wo diä gross Düne au no isch go erklimme! Hät so Spass gmacht! :) Nur isch mer nachher chli äs "Sandfraueli" gsi! :)

Am Namittag isch denn no bade und schnorchle ufem Programm gstande, bevor das lässige Weekend scho wieder verbii gsi isch!
Gaht leider immer z schnell ume!

Etz heissts wieder "schaffe" und warte bis s nächste Weekend chunnt! Sind scho wieder ame Usflug am plane! :D

Ich wünsche eu allne no ganz en guete Start i di neu Wuche und ihr werded nächst Wuche wieder vo mir ghöre!

Ganz en liebe Gruess i di verschneit Schwiiz!

Miriam