Wieder e Wuche ume...

D Ziit gaht soo schnell verbii da une! Am Weekend hani scho Halbziit gha i minere Familie! Äs isch amel Mäntig und scho isch Wucheend und ich han frei, chan en Usflug mache oder susch öpis undernäh!

Am Ziistig, 10. Februar, isch d Keely 5i worde. Mir händ am Namittag e grossi Geburritorte-Muffins-Bakery gah i eusere Chuchi! Sie hät sich en pinkige Cake gwünscht, natürlich als Nummere 5... Da händ mir eus öpis guets müesse ihfalle lah... :D
S Resultat gsehnd ihr uf dä Föteli. Mir händ Freud gha am backe und sie am Cake! So händ alli öpis gah dävo!

Das Weekend bin ich mit dä Minna (Au-Pair im gliche Dorf und sie chunnt us Finnland) id Adelaide-Hills gfahre und händ dä Tag det gnosse! Zersch händ mer en Abstecher zume Wildlife-Park gmacht! Ganz spannendi und lässigi Tier gseh, händ sogar chöne en Koala hebe! :) Denn sind mer wiitergfahre nach Hahndorf. Das isch äs Düütsches-Dörfli i dä Nächi vo Adelaide... Usgseh duets nöd vill andersch als di andere Dörfli rund ume aber chunnsch düütsches Bier und ässe über! Aber wie das amel so isch; vill z vill Touriste! :)

Denn sind mer im Ahschluss ufem Ussichtspunkt, wo mer über di ganz Stadt gseh händ! Isch würkli ganz schön gsi und für australischi Verhältnis recht Höch! (guet 700m über Meer) :D
Und denn isch scho 5i gsi! Mir sind no zume Nationalpark gfahre, wos eigentlich en Wasserfall hät! Aber das so trocke isch im Moment und da natürlich Summer isch, häts kei Wasser gha! Destotrotz isches en super Trip gsi det hi! Ganz schöni Landschaft... Eifach zum gnüsse! Mir händ en chline Rundgang gmacht, 1,5h zum laufe und sind dänn heigfahre!

Am Sunntig sind mer denn an Strand! Händ 1,5h müesse Autofahre! Händs Meer, Strand und d Sunne richtig chöne gnüsse det! Super gsi zum relaxe!
Det händ mer denn au no d Darianna troffe (sie han ich in Adelaide kenneglernt, chunnt us Amsterdam!) Z Dritte händ mer dä Namittag gnosse! Mir drüü gönd nächst Wucheend au zäme ufem Trip nach Kangaroo Island für zwei Täg! Freue mich scho riesig! Mag chum meh warte! :D

Äs anders Highlight isch dä Bsuech vome chline Tierli gsi i mim Zimmer! En Blauzungeskin (Blue Tongue Lizard)... Ich han natürlich nöd genau gwüsst, was das isch, obs giftig isch usw... Dä Kopf und dä Schwanz gsehnd ebe us, wie vonere Schlange! Denn han ich Föteli gmacht und die denn am Kalan zeiget, nachdem er vom Mittagsschlaf verwachet isch! Er hät mir denn Entwarnig gäh... :D So han ich das Tierli usem Zimmer glockt und dä Spuck isch verbii gsi! :D
Aber ufregend sind so Sache amel glich! :D

Das wärs mal wieder vo minere Siite! Hoffe eu gahts allne guet und ich melde mich nächst Wuche wieder, mit vill Neuigkeite und Föteli vo Kangaroo Island! ;)

Liebs Grüessli usem wieder warme Australie

P.S. Hät natürlich wieder neui Föteli zum ahluege! :)