South Flinders Ranges

Das isch mis letschte Wucheend gsi, woni mit dä Minna und Darianna verbracht han. Nächst Samstig gahts denn los nach Adelaide, wo ich äs Auto miete und am Sunntig denn Richtig Melbourne abdüüse! So wie's momentan usgseht mach ich das allei... Ursprünglich hät d'Darianna wele mitcho aber das isch alles chli kompliziert, da vo ihre no e Kollegin uf Sydney chunnt e paar Täg vorher! So wär sie nur underwägs, und sie isch ja in Adelaide zum e Arbet schriebe! :)

Mir händ alli äs verlängerets Wucheend chöne gnüsse, da am Mäntig en Fyrtig gsi isch! Händ für diä drüü Täg äs Auto gmietet und sind am Samstigmorge Richtig Norde ufbroche!
Als aller Ersts isch en Ihchauf vo Nahrigsmittel ufem Programm gstande! Frücht, Gmües, Joghurt, Brot, Z'trinke und Schoggi! :)

Nachem Ihchauf sind mer dänn in Mt. Remarkable Nationalpark gfahre, wo's au en Campingplatz hät zum Übernachte. Nach 20min sind beide Zält ufgstellt gsi und mir händ eus i zwei chline Städtli ufgmacht. Leider isch alles scho gschlosse gsi und mir händ e Beschäftigung müesse suche! :D So häts ganz lustigi Föteli gäh... Diä chan mer ufem Picasa go ahluege! Händ en super Samtig verbracht zäme!
Am Abig händ mer dä nächsti Tag planet und sind früeh is Bett, da Tagwach am Sunntig uf di 6i ahgsetzt gsi isch! :D

Ja und denn isch dä Sunntig scho bald vorem Zelt gstande... Hüt laufed mir vom Campingplatz nach Alligator Gorge, 13km ein Weg... Schaffed mir das äch???
Am 7.20Uhr sind mir denn los gloffe... Über Stock und Stei! Isch e wunderschöni Gägend zum wandere, wänns nur nöd soo lang wäri! :D

Vorem Mittag sind mir denn am andere Ändi acho! Händ z'Mittaggesse, eus chli müesse usruebe vo dene Kilometer! Ahschlüssend händ mir denn diä Schlucht bestuunt! Rechts und Links roti Felswänd... Dä Marsch hät sich also glohnt; wänn nur nöd i eusne Köpf gsi wäri, das mer alles wieder zrugg müend! E Mitfahrtglägeheit hät sich nöd ergäh, will alli Auto volle gsi sind und äs Taxi bstelle au nöd, da mir kei Empfang gha händ... So isch eus nur öpis übrig bliibe...
Schlussendlich sind mir am 19.35 Uhr zrugg gsi; mit schmerzende Bei, stechende Füess, Blattere und eifach nur enere riise grosse Erschöpfig! Aber äs Erlebnis isches alleweil gsi! Alles i allem sind das 30km gsi, machi also nüme a eim Tag...:D

Am Mäntig händ mer denn en ruhige Tag gha! Sind langsam retourgfahre und d'Dörfli underwägs bestuunt! Das isch super gsi, nacheme Tag wiä dä Sunntig...

Ja und etz heisst denn bald packe und Abschied neh vo Barossa... Isch e schöni und lernriichi Ziit gsi! Fallt mer uf di ein Siite schwer zum gah aber uf dä andere Siite wartet anderi, wunderschöne Erlebnis uf mich!

Diä Wuche händ mer no vill planet, wird also wiä im Flug verbii gah! Freu mi riisig uf dä bevorstehend Monet! Wirde eu mit Bricht und Föteli ufem laufende halte... :)

Bis bald!

Miriam