Weekend am Murray River

Sali zäme!

Äs isch wieder ei Wuche ume und Ziit für mich en Blogihtrag z mache! :-)

Das Wucheend han ich mit dä Minna am Murray River verbracht! Das isch en Fluss, wo dur zwei Staate flüsst! (Victoria und South Australia) Für eus isches nur öpe 30min Autofahrt zum erste Dorf a däm Fluss und 2h bis zum letschte Dorf! Am Samstig sind mir öpe am 10ni am Morge abgfahre und händ d'Dörfli entlang dem Fluss ahglueged, mal da mal det en Stopp gmacht und sind denn schlussendlich am Namittag in Renmark ahcho! Das isch s hhinderste Dorf.
Da s'Wetter super schön gsi isch am Samstig händ mir s'Zelt ihpackt und zeltet in Renmark! Am Abig sind mer denn is Dörfli gloffe vom Zeltplatz, nur öpe 20min Entfernig, händ det dä wunderschöni Abig gnosse!

Am nächste Tag isch s'Wetter leider nüme ganz so schön gsi! Bedeckt und daher au nüme so warm! Mir händ eus denn entschiede e drüü-stündigi Flussfahrt z mache ufem Murray River!
Zu eusem Erstuune sind mir di einzige Passagier gsi ufem chline Boot! :-) Dä Bootsmaa hät eus aber alles erchlärt mitem Hochwasser, wo 1956 gsi isch, hät eus di verschiedenste Vögel zeiget und susch d Landschaft erchlärt! Isch ganz spannend und au relaxend gsi! Sone Rueh uf däm Fluss! Und am Namittag isch denn s'Wetter churz au chli besser gsi! :-)

Nach dere Flussfahrt sind mir denn relativ direkt heigfahre! Dä Abig han ich denn gmüetlich i dä Familie verbracht und alles uspackt... Was mer alles brucht für eis Wucheend campe! :-)

Etz han ich no 2 Wuche i dä Familie bevor d'Reis wiitergaht! Freue mich scho sehr!

Nächst Wucheend gah ich mit dä Minna für drüü Tag id Flinders Ranges! Das isch e Gägend im Norde, mit National-Pärk und chli Outback! Wüssed di gnau Route momentan noni, werded das die Wuche aber sicher no usarbeite! :-)

Melde mich denn nächst Wuche wieder. Neui Föteli vom Riverland sind natürlich wieder druf! :-)

Hebeds guet und bis nächst Wuche!

Miriam